Олунньу 21 кунугэр "Айхаллан, Чурапчы!" фестиваль гала-кэнсиэригэр 146 киһилээх, 2 аккомпаниатордаах, 1 хормейстердаах 4 нэһилиэк Чурапчы, Хоптоҕо, Хатылы, Чыаппара холбоһуктаах хордарын толоруутугар, "Айылгы" норуот айымньытын уонна духуобунаьын дьиэтин сценатыгар М.А.Герасимова-Сэҥээрэ тыл, Св. Константинова мел. "АЙХАЛЛАН, ЧУРАПЧЫ" уонна "Кулун Куллустуур" олоҥхоттон М.Чепалова мел, Ек. Лыткина нотаҕа түһэриитигэр "Алгыс ырыата" толорулунна.

Нам улууһун Хамаҕатта нэһилиэгин “Түһүлгэ” сынньалан киинигэр “Күн эгэлгэ” коллекционердар түмсүүлэрин кыттыылааҕа Анна Заровняева “Мир музыки в статуэтках” быыстапкатыгар коллекционердары, көрөөччүлэри, сэргээччилэри түмтэ.

Быыстапка үөрүүлээх аһыллыытыгар “Хамаҕатта нэһилиэгэ” МТ баһылыга Евгений Ушницкай эҕэрдэлээтэ, Анна Захаровна нэһилиэк общественнай олоҕор өрүү көхтөөхтүк кыттарын бэлиэтээтэ уонна “Саха АССР 100 сылынан” үбүлүөйнэй мэтээли туттарда. Салгыы Ульяна Охлопкова фортепианоҕа, Степан Иванов баяҥҥа оонньуулларын, Мария Жиркова, Любовь Иванова ырыаларын иһиттибит.

Анна Захаровна бастаан парнай статуэткалары мунньан саҕалаабыт. Онтон баяны көтөхпүт үчүгэйкээн эбэ статуэтканы бэлэх тутан баран, бэйэтэ да музыкаҕа, ырыаҕа чугас буолан коллекциятын тиэмэтин кэҥэтэргэ санаммыт.

Хомустаах, баяннаах, гармошкалаах, скрипкалаах, барабааннаах, фортепианолаах, флейталаах, дудочкалаах, моринхуурдаах о.д.а статуэткалара араас материалтан: таастан, фарфортан, мастан, пластиктан оҥоһуллубуттар. Маны тэҥэ, араас омуктар көстүүмнэрин билсиэххэ сөп.

Саамай эрдэтээҥҥи статуэтка 60-с сыллаах ийэтиттэн хаалбыт балалайкаалаах уол. Коллекционердар Мария Аманатова, Вера Винокурова, Фаина Протопопова, Надежда Индеева, Сандаара Оротоо, Матрена Жиркова, Саргылана Индеева тиэмэгэ сөп түбэһэр статуэткаларынан кыттан быыстапканы кэҥэтэн биэрдилэр.

Салгыы түмсүүлэр, үөлээннээхтэр, аймахтар эҕэрдэлэрэ, баҕа санаалара этилиннилэр, коллекциятыгар бэлэх туттардылар. Тэрээһин кэннэ “Либерти” дуэт кэнсиэрин көрдүлэр.



Подробнее: https://xn--h1aaigu4ed.xn--p1ai/article/74552

Бөлөххө киир: Telegram WhatsApp «Музыка барыбытыгар» бырайыагынан Уус Алдан улууһугар үлэ тиһиктээхтик салҕанар. Улуустааҕы оҕо бибилэтиэкэтигэр  «Музыка дойдутугар айан» диэн тэрээһин бэрт сэргэхтик ыытыллыбыт. Оҕо ааҕар киинин сэбиэдиссэйэ Вера Алексеевна Портнягина кэпсиир: «Уруок СӨ бастакы Бэрэсидьиэнэ М.Е.Николаев 85 сааһын көрсө «Музыка барыбытыгар» диэн бырайыак иитинэн ыытылынна. Тэрийээччилэр улуустааҕы оҕо бибилэтиэкэтин , Бороҕоннооҕу музыка уонна искусство оскуолатын кэлэктииптэрэ. Наталья Николаевна Портнягина салайааччылаах Мүрү 1 №-дээх оскуолатын 2 «Б» кылааһын үөрэнээччилэрэ ыалдьыттаатылар. Оҕолор музыка туһунан, урут үстүрүмүөннэри хайдах, туохтан оҥороллорун, ханнык үстүрүмүөннэр баалларын, музыканы ким суруйарын, о.д.а. сэҥээрэн, сэргээн иһиттилэр. Музыка историятын туһунан  музыка теориятын учуутала Инна Владимировна Ильина кэпсээтэ. Итиннэ сыһыары тутан, фортепиано кылааһын учуутала Вероника Дмитриевна Никитина, домраҕа уонна гитараҕа үөрэтэр Лена Игоревна Яковлева үстүрүмүөннэргэ оонньоон иһитиннэрдилэр. Кинигэ быыстапката болҕомтону тарта. Оҕолор кэпсэтиигэ көхтөөхтүк кытыннылар, ыйытыыларга хоруйдаатылар. Бары музыка оскуолатыгар киирэн үөрэниэх баҕалара улаатта, «эһиил хайаан да киириэхпит» дэстилэр. Түмүккэ, бука бары ырыа ыллаан доргуттулар. Манна даҕатан эттэхпинэ, маннык тэрээһиннэр билиини-көрүүнү хаҥаталлар, олус туһалаахтар. Онон уруоктарбытын бу курдук тиһиктээхтик салҕаан иһиэхпит«, — диэн сырдатта Вера Портнягина.

© sakha-sire.ru сайтан: https://sakha-sire.ru/muzyka-dojdutugar-ajan-video/